Хотирани мустаҳкамлаш

Яхши хотира, унга эга бўлиш ва унга салбий таъсирлар ҳақида маълумотлар

Хотира – инсон асаб тизимининг энг муҳим функтсияларидан биридир. Хотирани мустаҳкамлаш кўпчиликни қизиқтирадиган саволдир. Унинг бузилишида инсон ҳаёти давомида ноқуайлик сезади ва бу жиддий неврозлар, депрессияларга олиб келади. Агар хотиранинг бузилиши узоқ давом этса, бу инсонни меҳнат қилиш қобилиятидан маҳрум этиб, ногиронликка олиб келиши мумкин. Кўп ҳолларда қариялар хотира пасайиши туфайли ҳаёт давомида оддий юмушларни ҳам бажара олишмайди. Қарилик туфайли хотира заифлашувини одатда тузатиб бўлмайди, аммо ёшликда кузатиладиган бундай муаммоларни тузатса бўлади.

Хотира билан боғлиқ муаммоларга ҳатто болалар ҳам дуч келишади. Бундай муаммоларни эътибордан четда қолдирмаслик керак, чунки инсон келажакдаги ҳаётий қобилиятлари хотира билан чамбарчас боғлиқ. Болалар хотира пастлиги туфайли ўқишдан ортда қолади, таълим олиш муассасаларига боргиси келмайди, бола асабий, жахлдор ва йиғлоқи бўлиб қолади. Муаммога эътиборсизлик қилинса, унда хотирани ривожлантириш қийин бўлади, шу сабабли чораларни ўз вақтида кўриш керак.

Ҳозирги кунда хотирани яхшилаш учун медикаментоз терапия ва халқ табобати воситаларини қўллаш мумкин. Агар хотира жуда ҳам пасайган бўлса, шифокор билан маслаҳатлашиш тавсия этилади.